أبويا…بقلم الفلاح الفصيح معوض حلمي
أبويا اللي كان فلاح ،
كان في البلد لامع
كان رزقه ع الفتاح ،
كان مدرسه وجامع
سابلي الكرامه سلاح
والفاس ميراث عدله
والأرض تشهــد له ،
لعلومـهـا كان جامع ::::
أبويا مـن عفته
شد الجسـور مسطـره
وراسـه من عزته
طالت شواشي الدره
والعصر في المندره
لم الجيران حواليه
والناشفه كات ف إيديه
طريـــــه ومخضـــــــره :::
أبويا كـان طيب قـوي
كالنبـع صــافي
كان زي نسمـه حنينـه
ترمي العـوافي
كان لمـا يقعــد وسطنـا
يحلى الكـلام
والمغربيه فحضنه انام
كان حضنـــــه دافــي ::::
أبويا قبل السواقي
خضر غيطانه البور
مالفجر يروي الشراقي
بشادوفه والطنبور
يسـرح ينقـي العفـش
وف إيـده عوائه
كات أرضـه مشتاقـه
وغنـاه يلـم طيـــور ::::
أبويـا شـق المراوي
طهـرها م المبسوطـه
لشطوطهـا كان غـاوي
زرعـها كـام توتـه
بنالــه عشــه هنـاك
ضـلتـهـا جـمـعـانـا
وجاموسته شبعانه
في وتدها مربوطه ::::
أبويـا حش الربـه
بطنيـن بسـن السيـف
وراح يخضـر غلـه
بدارها غيـه وكيـف
ماخافش يوم م الشتا
ولاهـزه ريح أمشير
والربه عايزه نشير
لاجل الدريس ف الصيف
التعليقات مغلقة.