روبابيكيا القلوب
بقلم /أحمد يوسف سليم
قرب قرب
تعالي وشوف
فرشنا وهنبيع ع المكشوف
معانا قلوب استعمال خفيف
تنفع شتا أو صيف
قلوب يدوب اتخانت
وعلى اللي حبتهم هانت
وقلوب لقناها ضايعة
وقعه من قلوب بايعة
قرب قرب.. قرب تاني
معانا عرض لقلب أناني
وخصومات علي
قلوب مليانه حقد وغل
شغاله زي الفل
وسرعتها مش بتهدي ولا بتمل
قرب تعالي شايفك ليه مكسوف
وعنيك مليها الخوف
لتلاقي قلبك ع الفرش معانا
في قسم الغدر أو الخيانه
ع الفرش قسمنا القلوب لاقسام
اطيب قلب فيهم مهان
وانقاهم واصدقهم تعبان
والخبيث فيهم له هيبه وصولاجان
روبابيكيا القلوب مش جديدة
دالفرش هنا من زمان
وبيقف عليه ناس كتير
والغني قبل الفقير
التعليقات مغلقة.