كلب غيطاني
بقلم معوض حلمي
عايز اصاحب كلب غيطاني
كلب يبيع الدنيا عشاني
يبعد عني الريح لو وجاني
كلب غيطاني ..
يقرا وشوش الناس ويصور
جن مصور
يقدر يتلون ويحور
يحفظ سري يكون عنواني
كلب غيطاني ..
كلب يكون مولود ف الحاره
عنده زريبه وفيها حماره
يعرف حق الجار والجاره
وصاحب صاحبه وغالي تمامه
جاب إلهامه وعبى كياني
كلب غيطاني ..
كلب وفاهم إيه الفوله
وإمتى يقوم ويصيد الغوله
ويجي ونور الفجر يشقشق
كلب مدقدق
لما تشوفه عينيك هاترقرق
عامل إنه ماهوش منينا
ولا فاهم ولا عاش وسطينا
إبن لذينه
لئيم ومخاوي / زي الحاوي
جابلي البيضة
وطلعت فكرة نور سكناني
كلب غيطاني ..
كلب يجيب الديب من ديله
ديب لو قرب منى ياويله
راح يغتيه ويسود ليله
ويوهب روحه الغاليه عشاني
كلب غيطاني ..
كلب مثقف يحرس شعري
يجيب لي الفكره ويثري مشاعري
ملامح حزنه زي ملامحي
وشعره الاكرت يشبه شعري
ويبقى حبيبي ونصي الثاني
كلب غيطاني ..
كلب وعاشق للأشعار
طيب جدا مش غدار
وشه بيضحك ليل ونهار
رامي هموم الكون ورا ضهره
راكبه مهره
رافع طهره الغالي شعار
صوته غواني .. شد وداني
كلب غيطاني ..
كلب مذاكر همس شفايف
راح الغربه زيي ولافف
جرب فيها أصيل الطبع
وابن الهايف
كاشف كل وشوش الزيف
قلبه عفيف
عارف إن الدنيا محطه
فشال الشنطه
وجاب الحكمه وراجع تاني
هبهب جامد جوا وداني
كلب غيطاني ..
كلب مالوش في إخواته شبيه
فكره نبيه
هارش فكر ولاد الإيه
شالني كمان ف حبابي عينيه
ومد إيديه لتنين غطاني
كلب غيطاني ..
كلب يحارب كل فلاتي
شايل كفنه زي حلاتي
كلب يسامح كل صفاتي
وانفعالاتي الهايجه يوماتى
يقرا حروفي يكون وزاني
كلب غيطاني ..
كلب ان مات هايقولوا خساره
كان بيدفي ولاد الحاره
عمره ماساب الناب نهاب
ولا كان بايع للأحباب ولاكداب
ولاكان عايب
كان بيأدب في المربوط
ف يخاف السايب
كان سايب ليا الحكمه
وكات مالياني
كلب غيطاني
كلب يطبطب ع الجلابيه
يغسل جهل ملاها اسيه
وهى البانيه في عز بلادي
جهل منعها تخش نوادي
آسي وسادي
وظلمه عماني
كلب غيطاني ..
كلب يشيل الفاس ويايا
إيده بإيدي يغني غنايا
أسرح يجيي يوماتي معايا
ويبقى سنابل تملى عيداني
كلب غيطاني
يبل ف ريقي
ويبقى صديقى
وقلبي الحاني
التعليقات مغلقة.