التوكتوك بقلم جمال زكي عينر
يا توكتوك انت يا متكتك
على الطريق ماشي تتأنتك
بتخش من حارة لحارة
طاير كإنك طيارة
واخد في وشك كده على طول
ماليكش عرض ولا ليك طول
شمال يمين وبتتمخطر
وع الزبون كده تتمنظر
بتعدي من تحت الأتوبيس
وفي الزحام دايما بتهيص
مالاكشي حاكم ولا قوانين
حبة عيال همه السايقين
بس بصراحة انت نافعنا
ومقضيين بيك مصالحنا
لو زنقة تمشي على الرصيف
وف ثانية تخلع عشان خفيف
بتلف من اضيق حارة
من غير ضجيج ولا زمارة
وأجرتك على قد الإيد
لا كريم واوبر ولا مواعيد
بس اللي ناقصك يا صغير
حبة امور كده تتغير
تخش في الدولة بتنظيم
وتبقى محسوب ع التقسيم
وما يسوقكش الا برخصة
والغلطة فيك تبقى بحبسة
ولا بد من لوحة بأرقام
وتبطل الزيطة والهوسة
وتبقى ماشي في السليم
ولا يقفشكش صول لئيم
تروح شمال وتروح يمين
وتعدي من اجدع كمين
التعليقات مغلقة.