بيحبني بقلم جمال زكي عينر
بيحبني بس معاند
وعامل انه مش واخد
في باله وانه مش عارف
بنظرة مني يتاخد
ودا كله عشان آل ايه
ما يدي الحب ولا ياخد
يا سيدي خلاص بلاش منك
ومش عايزين وداد منك
ده لو حبك ماجاش منك
ما احبش وانت مش رايد
بيحبني بس مكابر
وللخاطر ماهوش جابر
مع انه للهوى مشتاق
وعلى بعدي ماهوش صابر
بيبان عليه ف نظرة عينيه
وف لهفته لما بسافر
التقل ليه والعند ليه ؟
ليه في الغرام ليه بيعافر ؟
بيحبني طب ليه تقلان ؟
وعامل انه كمان زعلان
حركاته مش خايله عليا
الكدب دايما في عينيه يبان
لكن راح اعمل مش عارف
على زعله إني كمان خايف
واهو كله دلوقتي بيمشي
ان كان حقيقي او كان زايف
بيحبني مسيره يجيني
ويقوللي يا حبيبي ارويني
من عطف قلبك وحنانك
وريني حبك وريني
وهبقى على سابق عهدي
ومش راح اسقيه من صدي
لاني متأكد انه
بيحبني ورايد ودي
التعليقات مغلقة.