مش قرارك
بقلم أحمد إبراهيم النجار
مش قرارك او شروطك
او كلامك او وجودك
او خريفك او جفافك
ياللى عايش فيكي ليلك
والنهار مسجون في دارك
مش قرارك
لما اكتب ليكي راحل
عن شطوطك
عن بحورك عن نيرانك
مش قرارك
لما اشطب اسمي فيكي
من شهادة الميلاد
إنى اهجر حلمي ليكي
انى اهجر من سكات
إنى الومك او اعتبك
من غيومك
الف حلم فيكي مات
واللى باقي جرح ساكن
ف الملامح بالأهات
بين دروبك
الف صرخة
الف دمعه
كل فجر بيتولد
لسه حابي فيكى مات
اااااااه يا جرح ف قلبي ساكن ااااااه يا صرخه فى الأماكن ااااااااه ياليل بسواده حالك
اااااااااه وده من الف عام
وعام وعام هو حالك
مش قرارك او شروطك
او كلامك او وجودك
او خريفك او جفافك
ياللى عايش فيكي ليلك
والنهار مسجون في دارك
ع الرصيف القلب باكي
من جمودك من ردودك
من قسوتك من عذابك
مش قرارك
إنى اهاجر او اموت
فى البحر غارق
او اتوه بين المشارق
او اغرّب فى المغارب
مش قرارك
نار نهارك حرقه توبي
والجفاف ساكن دروبي
من سنين
من صغري حابي
ع المزارع ع السواقي
والجفاف ساكن بيوت
والنهار مالهوش وجود
ليل قبيح
ساكن وعاشق يحضنك
الف الف الف عام وبيرسمك صورة بهته
ع الحيطان
ع الجدار
ع الجزوع
ع العيدان ناشف حصادك
مش قرارك او شروطك
او كلامك او وجودك
او خريفك او جفافك
ياللى عايش فيكي ليلك
والنهار مسجون في دارك
مش قرارك
انى راحل او مهاجر
او اتوه بين المشارق
او اغرب فى المغارب
مش قرارك
بقلم الشاعر المصري د. أحمد إبراهيم النجار
التعليقات مغلقة.