فاضي شوية شعر جيهان النجار

وهستناك على الناصية
عشان ….نتمشي عصرية
ف عيون الناس
نراجع كل
أفكارنا
نداري الحزن
بهزارنا
تصحح لي جميع اخطائي
ف الإحساس
تغديني علي حسابك تدخلني
ف كتابك ياسيدنا
تعلمني ألف باء
العشق ……والصبر والإخلاص
بتوحشني وبدأ
الحزن ينهشني
وقلبي ضعيف
انا ياحبيبي من
بعدك بقيت
تخاريف
مشاعر قلبي
مصدية
كأن القلب أصبح
صاج ومتكوم
عليه ميه
انا قبلة عيونك
دول
انا التكبيرة
والنية
انا الفرض ..اللي راح منك
وأحضاني مصلية
تعالي أوقوم
متسألشي اللي
فاضل ايه
ولا حتى اللي
ناقص كام
تعالي نختصر يومنا ونقسم
عمرنا على اتنين
زمان الحب
بيخايلوه
وعصر الهمس
لو نخلوه
مافيش حاجة
هتبقي لنا
ياريتنا نحتفظ
بالحلم أصل النور هيسألنا
على التفاصيل
تعالي وهات
معاك الحب
وان مالقيتش
شوف لي بديل
بقولك ايه ؟
فاضي شوية