رغم المشيب
بقلم معوض حلمي
عايزه تسمع
كلمه مني باللسان
وهى نايمه جوا نني
في الأمان
والمشاعر كلها
من نور عينيها
وف قلبي ليها لو اتفتح
نوة حنان
وانا أصلي
عاشق بالوما
وغنايا حب
حافظ عهودك إنما
باغطس واقب
تايه وبحرك ياحبيبتي
مالوش مراسي
حكمك دا قاسي
لما قولتي الحب ذنب
والنظره أشرس موقعه
ف غزو المشاعر
وعنيكي فكره مقنعه
وانا قلبي شاعر
ماليش في زيف الأقنعه
وسهامها شارده
أتاريكي ورده ياحبيبتي
بقلب واعر
وليه دروس الحب
قاسيه ومؤلمه
بتسيب أثارها
جوا روحنا معلمه
من بين ركام الذكريات
والروح شتات
تكبر آهات
وانتي الحبيبه الملهمه
جابوا الأطبا
لما زاد بعدك جفا
قالوا الأحبه
بالوداد هما الشفا
فجريت على بيتكم
أنادي بلهفتي
البرد ساكن جتتي
وانتوا الدفا
وانا عمري عدي
في التمني ياحبيبتي
وانتي لسه بعيده عني
زي مانتي
لسه سايقه
في القساوه والصدود
لسه بانيه في السدود
وزايده حيرتي
وبرغم جرحي
غويط وغاير
انا برضه
شاري ياحبيبتي
ولسه صابر
لسه راسمك سوسنه
رغم المشيب
والروح نحيب
طيفك طبيب
جاي بالبشاير
دي بذرتي وأرضي عمار
ضامن طلوعها
تكبر وتملى الكون خضار
ويطيب فروعها
تطرح محبه
في كل دار
وتطفي نار
وسفينتي دايره
في المدار
ممنوع رجوعها
وسفينتي دايره
في المدار
ممنوع رجوعها
التعليقات مغلقة.