حصاد العُمر
بـ قلمي
أسـمـاء الـبـيـطـار
كتير مننا بيشتكي من اللخمه و زحمة الحياة الدنيا اللي بقت جرى في جرى و مش لحقين ناخد نفسنا
بيبدأ يومك بحاجات كتير خلصت بقى وله ما خلصتش انت و نصيبك
و في وسط الزحمة دي ناس عُمرها ما راحت من بالك ديماً بينك و بين نفسك بتسأل عليهم مش ناسيهم و يمكن بتهرب فيهم من اللي انت فيه بتوه في حالهم و احوالهم و يا ترى عاملين ايه .
بتدعي ليهم من قلبك و بتتمني يوم يسمح بيه الزمان و تعيدوا اللي كان صحيح انتوا مش قرايب و لا حتى من بعيد .
دوول ناس جمعتك بيهم سنين دراسة و ايام و ليالي غُربة
و في منهم جيران
اساميهم مُختلفة بس قلوبهم واحده .. جدعنتهم مش علشان حاجة
فاكرينك و فاكرهم بالخير . وقت الوجع بتبقى محتاج ليهم اكتر من اي حد .. مقدر بُعدهم و بتتمني قربهم .
بس بحُكم النصيب كل واحد بقى في دُنيته منهم اللي قُريب و منهم اللي بعيد .
بس وقت الجد بتلاقي ضهرك مسنود
ووقت الفرح قلوبهم هي اللي بتحضنك حتى لو من بعيد بتبقى حاسس من الكلام اللي بيخليك حاسس بفرحة فوق الفرحة
لو فيه خير جاي لحد فينا بنقسمه على بعض
الـصـداقـة الحقيقية ..
من اجمل المشاعر في الدُنيا مش بُكتر الناس اللي حواليك بس بصدق قلوبهم في المحبة
عُمري اللي تخطي منتصف الأربعين دُنيتي اللي عشتها دي طلعت منها بأربع صديقات بأربع اخوات لم تنجبهم أمي
بأربع قلوب من انضف القلوب اللي ممكن تقابلها
اختاروا اصدقائكم لأنهم حياة داخل الحياة يمكن اللي بيخلوك تحس إن الدُنيا بخير
و فعلاً هما حصاد العُمر بعد ما تتم رسالتك في الحياة مش هتلاقي غيرهم .
التعليقات مغلقة.