أنا مش غريب…شعر مسعد البحراوي

أنا مش غريب
لكن غريب
دا انا حتى روحي مغربه..

نصحني أكتر من طبيب
قالوا دواك الطبطبه..
طبعك عجيب
والمستجيب لَكْ مَرتبه ..

محتاج تقوم والعله نوم
والحلم عوم ورا ثَعلبه..
قلة دواك في سوق هواك
صابك ارتباك الأرنبه ..

غرقان في طوق وقت الشروق
والطير بيمدح مَذّْهَبَه

قالوا في المقال
زمن الرجال لعب اعتزال
ومال لِتِيم المسطبه..

قلت الأمل قد الجبل والمحتمل
يحصل تبادل أَجوبه..

قالوا مفيش عندك آمال
دور ل نفسك ع الجواب
واقلب شجونك موهبه ..

طلعها واحقن مهجتك
شيل شفتك من سنتك
وابدأ خطاوي سكتك
وادعي بدعوه مؤدبه ..

والسكه أصلا مغلقه
بِجبل وف إديك ملعقه
بيعلموك تاكل شقى
كل العلل شوفناها فيك
وكل عله مُركبه
……..
شيال حمول يابن الأصول
عايش بطل عندك حلول
و الحال تسيب المركبه ..

ومفيش بديل للمستحيل
تبقى بن ليل
شمسك في حيط متركبه

مسعدالبحراوي