البنت الحلوة بقلم اشرف الشناوى شاعر عاميه البرامون
البنت الحلوه السنيوره
اجمل بكتير كدا م الصوره
محلاها البنت المصريه
بضفاير مجدوله عفيه
والضحكه تقول يعنى السكر
وعينيها الحلوه العسليه
وخدود رمان جوا الغيه
ياحمام ماتطيرش العصريه
محلاها البنت المصريه
نجمايه بتمشى وتتغندر
فى الريف ان كان او فى البندر
وعرقها تقول عنه لافندر
محلاها البنت المصريه
لمبات بتقيد كدا وتنور
البنت الحلوه السنيوره
اجمل بكتير كدا م الصوره
يارموش الليل وعيون الخيل
قمرايه وماشيه على السكه
بسبوسه ياناس نفسى فى حته
اه ياجبنه قريش زى الزبده
طاجن مختوم والقشطه تعوم
واسمها فطوم بنت الحته
محلاها البنت المصريه
عشقها منقوش فوق الجدران
محلاها الميه فى ايد عطشان
تسند فى الروح وتعديها
شمعايه تنور حواليها
وتخلى الدار فى العتمه نهار
لؤلؤ يامحار عمال يضوى
البنت الحلوه السنيوره
اجمل بكتير كدا م الصوره
والعود الزان طالع متزان
والماشيه ميزان كفه بكفه
بتشد الروح ماطرح ماتروح
من لمس ايديها بندفا
محلاها البنت الحدوته
صفصافه ان كانت او توته
محلاها البنت المصريه
لحن ومتفصل عالنوته
البنت الحلوه السنيوره
اجمل بكتير كدا م الصوره
…………………
التعليقات مغلقة.