ناصية حلم…شعر نجلاء الشنواني
اضحك على نفسك واخدعها
عَيٌشها ف وهم اللا محتاج
حاول تقنعها بتعاويذك
وإنك بالوحدة بتتهجد ..
بخيال بيضم ف تفاصيلك
وبيحضن كل شعور بالخوف ..
السارح يبدر ف عروقك خماسين البرد
بيهد سؤال مش لاقي الرد
رغم الإلحاح المتمرد ..
على هوجة العند المجتاحة ..
لكل التراتيل
على شوق ف الليل
بينادي الصورة المطبوعة ..
في مخدة بتمسح ف دموعك ..
ويا المناديل
على لحظة بترسم حكاياتك ..
على حيط القلب المتصدع ..
بشقوق من خوف
على قُصر الشوف
للعمر اللي بيجري وسايبك ..
على ناصية حلم بيتحايل ..
تهجر أراضيه
تلحق بالباقي من الباقي ..
وتروح تراضيه
ما سألتش شوقك ولا مرة
إزاي بينام من غير ما ينام ؟
إزاي بيمثل على قلبك كره الأحلام ؟
إزاي بيعاني من الوحدة ..
بينه وبين نفسه ..
ويظهر لك وكأنه تمام ؟
طبطب على كتفه وغني له
لحليم اغنية قالها زمان
“خايف مرة أحب وعارف
ليه انا قلبي خايف “
هتلخص حالتك وتقولك ..
إنك عطشان
لمشاعر تحضن فيك لهفة
لوجود إنسان
التعليقات مغلقة.