أنا مصري بحب مصر…شعر عبدالكافي فاروق عبد الكافي
زجل بالعامية في حب مصر يبين فخري واعتزاز بوطني الغالي وحضارته وبكل رموزه في شتى المجالات.
أبومازن عبد الكافي.
أنا مصري .. بحب مصر
أنا مصري من ساسي لراسي
ودا هو نبضي وإحساسي
واكتب بقلمي ف كراسي
في حب ستي وتاج راسي
ونور حياتي ونبراسي
اللي هواها ف أنفاسي
بلدي مصر.. بحب مصر
أم البلاد .. دي هية مصر
ونيلها زاد .. في كل عصر
وخيرها وافر في المدن ..
وف كل قرية وف كل كفر
وابن البلد بيحبها ..
إن كان ف عشة أو كان ف قصر
بلدي مصر .. بحب مصر
أرض العروبة .. أم العرب
أرض الجهاد .. وقت الغضب
دار الكرامة والبطولات
أعداءها لاذوا بالهرب
بلد الأصالة و الأهرامات
وبحرها ما ف يوم نضب
بلدي مصر .. بحب مصر
في الدين تلاقي المصراوي
ودليلي هو الشعراوي
كلامه نابع من قلبه
مش بس أحداث وحكاوي
في الفقه ييجي محلاوي
عطية صقر في فتاوي
ترشد وتهدي عقول الناس
وتصد كل شيطان غاوي
بلدي مصر .. بحب مصر
فيها اللي حفظوا كتاب الله
صوتهم يدوي في كل الكون
رفعت و باسط و الحصري
والبنا ويا المنشاوي ..
جبريل وصوته العذب كمان
مع صوت ورنة طبلاوي
بلدي مصر .. بحب مصر
تسمع كمان فيها ابتهالات
ذكر ودعا لرب السموات
وكلام يخوفنا من النار
بصوت حزين من عم طوبار
و النقشبندي لصوته رنات
تاخدك وتسبح في الجنات
بلبل يغرد بالتسبيح ..
كروان بينشد بالآيات
بلدي مصر .. بحب مصر
والعلم فيها وعندي دليل
يشهد علي دكتور زويل
في العلم بالإعجاز بنقول
قرآنا هو أعظم دستور
في آياته إعجاز رباني
بيبينه دكتور زغلول
بلدي مصر.. بحب مصر
للطب فيها طرق ودروب
حتى اسألوا دكتور يعقوب
للطب في إنجلترا أبراج
يشهد عليها دكتور فراج
في الطب أمثلة ع التصميم
ودليلنا هو دكتور غنيم
وكمان دا عدي كل الحدود
حتى اسألوا مصطفى محمود
بلدي مصر .. بحب مصر
والمصري كان على نفسه حويط
لما اخترع فن التحنيط
وآثارنا تشهد بحضارة
ولغاتنا باقية نقوش ع الحيط
بلدي مصر.. بحب مصر
والفن فيها ماله مثيل
مش بس في الغنا والتمثيل
أدب ونحت ورسم جميل
ولا العمارة.. دا فن أصيل
وعلى الكلام ده مليون دليل
ودا بس موجز مش تفصيل
روحوا اسألوا شوقي ودرويش
وحليم وسومة.. متقوليش
رامي ووهاب والسنباطي
دول فنهم هو اللي يعيش
مختار كمان وحسن فتحي
مثال.. و معماري زيه مفيش
شادية وأمينة رزق وفاتن
والسندريللا .. والحرافيش
والدونجوان ابن أباظة
وفريد وأنور والألاديش
وأسامي ياما كتير غيرهم
كانت تنور على الأفيش
بلدي مصر.. بحب مصر
وفي الكوميديا.. عادل إمام
مرسي الزناتي كانت أيام
أحمد زكي ويونس شلبي
في المدرسة ياما قالوا كلام
اتعلموا “أخلاء” ونظام
واتقدموا خطوة لقدام
عيال وكبرت وبقوا مثال
في الفن لبقية الأجيال
من قبلهم كان عمو فؤاد
أستاذ بيحكي ع الأمجاد
مولد يادنيا ومدبولي
أسمع معايا يا عزولي
يرحم زمان اسماعيل ياسين
مع الريحاني أبو رتم رزين
يرحم زمان وليالي زمان
والناس يامتهني يا فرحان
بلدي مصر .. بحب مصر.
شعر : عبدالكافي فاروق عبد الكافي.
أبومازن عبد الكافي.
التعليقات مغلقة.