محمود رأفت يكتب قطر الساعة 12

صاحبي اللي النور فى عيونه ملايكة
بتحدف قلبي اليمة التانية من الكورنيش
نوفوتيل بيكلم نفس البرج
الطالع من زور القارّة
وبيسأل لو مرة نجاوب
على كل الأسئلة ونحدد
كل اتجاهات القلب الرافض إنه يعيش
أو يمكن إن مافيش إجابات
تستاهل طولة البال والصبر
صوت الأتوبيس العام
وزحام المترو
بيحدد تفاصيل أشواقك لو يوم كتروا
وبتقدر تعرف قيمة الإحساس
لما تسبب فرحة لحد
أو تقدر تعرف قيمة نفسك
لو مرة لقيت وشك فى الأرض
السما بتطل عليك
وبتفتح قلبك للحواديت
صوت الركاب فى القطر
وكلام الستات
عن مين إمبارح مات
أو مين اغتم
أو كلمة أب بيجرى عشان فتفوتة عيش
أو دمعة أم
السكة حكاوى كتير
بتعيشنا ونفضل عايشينها
وتقش دموعى اللي قدرت في سنتين
أكتمها فى قلبى وأشيلها
لحظات الشكر
اللى بتخلق لك جناحات ..
يمكن وقتها تقدر تتجنن وتطير ويا القطر
وتبص بعينك للدنيا وبكل ثبات
الشجر الأخضر
والإشارات
والدنيا الواسعه والحوارات
كان ممكن تقدر تتجنبها
لو كنت اتأخرت شوية
ووصلت لقيت
قطر الساعه 12 فات