راجع بقلم محمود رأفت

راجع بقوة يا مصر
للنيل
وغناويكي
والشمس والضلة
وحصيرة التعسيلة
راجع لحضن السما
لعيونك الزرقا
للسهرانين
، للسهر
والذكريات الجميلة
قاعد مراكبي أصيل
في مركب الشلة
بيغني في المواويل
ومولع التيلة
قهوة جنابك إيه
قال قهوتي سادة
وحلاوة التنغيم دايمًا تكملها
يا رقتك يا نسيم
لما تلاعبنا
وترقصّ البرسيم
في غيطانه تحييها
أنا مالي صدري الهوا
باتنفسه وباشهق
باترجى رب كريم
إنه يعدّلها
راجع بقلب كبير للشِعر والمارّة
وباغني للميادين واسكت وأسألها
فاكراني لما مشيت في عيون شوارعها
ليه لما فقت لقيت فجأة انقلب حالها
وبقيت يامصر باشوف في عيونك الدمعة
قومي امسحي دمعتك، أنا قدت لك شمعة
وبلاش تجاهل بقى، عارفك تسوقي طناش
مهما أغنيلك بالاقيكي مش سامعة
راجع بقوة يا مصر
للحضن
والجيرة
والمشي ع الكورنيش
للناس وللحيرة
راجع لضل البيوت
والأهرامات والقصر
راجع عشان حنيت
ووحشني طعم النصر
للأهل، للحوانيت
والنومة وقت العصر
راجع لحضن الغيط
راجع بقوة يا مصر