مش داريين
بقلم أبومازن عبدالكافي
جنس الحمير انقرض
وهنعمل ايه يا خال
ولا عدنا لاقيين ركوبة
ولا ينفع الشيال
كان الحمار الأصيل
يتحمل الأحمال
ولا عمره يوم اشتكي
ولو مرة حمله مال
طول عمره حمال أسية
صبره يهد جبال
جنس الحمير انقرض
وهنعمل أيه ياعم
علشان تزورني وأزورك
بقينا نحمل هم
علشان تشيل أي شيلة
لازم تدوق الغم
فين بس راح الحمار
ليه بس هجر الدار
ليه بس ساب البلد
والعزبة والدوار
تبقى الإشاعة صحيح
اتحكم الأشرار
وبقت تجارة الحمير
مخصوصة للجزار
ياخدها من اللي يبيعوها
بالجملة بالقنطار
ويبيعه لحم مشفي
بالكيلو .. يا ستار
على أنه لحم جاموسي
لغلابة ناس مساكين
وهما ياخدوا وياكلوا
وبطعمه مش حاسين
ويقولوا فين الحمير
ما انتو لها واكلين
كلتوها.. مش داريين
أبومازن عبدالكافي .
عبدالكافي فاروق عبدالكافي بدوي
التعليقات مغلقة.