قطر الموت كلمات درويش جبل
…………..
القطر صابه العمى
م الهم فقد البصر
بقالو فوق ميت سنه
شايل هموم البشر
ماشى ف صبح ومسا
ويعدى فى محطات
لا عمره كل وتعب
ولا عمرة قال آهات
وهات يا جرى وشقى
عايش حياته شتات
……………………….
عرباتة ……متكدسه
فوق بعض متكربسه
هموم وفوقها هموم
وكل هم واخوه
سهران يعد نجوم
يحلم بساعة اللقا
يصحى ف عز النوم
يسأل وصلنا لفين
قالوا له متسألشى
ياعم نام واتخمد
يمـكن ما توصـلشى
تقولشى باب السما
ساعتها كان مفتوح
القطر حــاول يزمر
صوته طلع مبحوح
……………………..
القطر قبل المحطة
زمـر وقال توت
قالوا له رايح فين
ياسبنسة يا هلفوت
ردد بصوت مكبوت
تعبت لف وشقى
وجرى ف الملكوت
القطر بص يمين
ومعندهوش مرايات
لقى الشمال شغال
وف لحظة عدا وفات
صبح الجميع أموات
……………………..
بتبكى ليه يانفر
لِم الجثث دى وهات
المجروحين على جنب
روح ادفن الاموات
وهيا فين الجثث
أشلاء دى ولا فتات
بلاش كـــلام يانفر
نضفـها………..بمقشات
واغسل مكان الدم
بكلور ……وكيماويات
لو جثه فيها كرونا
تنقلها ……للبهـــوات
أصل المعاينة هتيجى
وهتكتر السؤالات
……………………..
بتبكى …ليه…. يامه
عملتى….إيه….. ….ليا
أنا من سنين باشتكى
ما سألتى يوم فيا
زعلانه ليه وانتى
مش خالصة ف النية
وللدمــــوع وفـــرى
بس ادفعى الدية
………………………
التعليقات مغلقة.