والقلب لسه بيحتوي
كلمات مسعد البحراوي
وجه الشبه بينك وبيني
كبير أوي
مجبر أعيش بين التعالب فهلوي
وٰاظهر قوي
وٰانا قلبي أخضر في الأساس
رافض يلف ويلتوي
…لكنه جواه ألف قلب
فرسان وسايقين الحِسان
دايسين على بساط الجنان
والحُسـن منهم برتوي
وأنا الأمير
أمير بغير على طرف شعره من بعير
منسوب لنا
مش غاوي هَدْهَدِةِ الحرير
كل اللي عاوزه وصْلنا
ياحبيبتي حتى الشوق غدر
أمسى نصيب وصبح قدر
وصل لمرحلة الخطر
مرغم أحبك منطوي
وفيا المشاعر
وحبة صور
وضله في شجره
هجرها الثمر
وضي ابن ليل
بيظهر جميل
وبستان مخاوي النصيب والقدر
معايا المشاعر ببيعها ببلاش
وصوري ناصبها في لوح ابلكاش
وضله لابسها بدال القماش
وضي خيالي اللي سهران دوام
جميل آه ولكن كتير الملام
وبستان بتسقط زهوره أوام
معايا المشاعر زمانها خلص
وصوري اللي قالت لعمري إنت لص
وضِله تعايب فؤاد اتملص
جمالها مزيف وملهوش أمان
ولسه كمان
ولكن كماني هيعزف أنين
خانتني السنين
وقدري إني أعزف دُعا الميتين
في أشعاري
وانشرها حاله فوق جدار الفيس
حُملت طاقه فلمحوا أوزاري
مشافوش حقيقه مغرقه الكراريس
الندل باع وبيوصفوه شاري
والشاري جوه الساقيه حُر حبيس
خاب الفؤاد وعصرلي أفكاري
والفكر دايما يكره الترابيس
إن كان عجبهم عزف أوتاري
ليه الموسيقى نابعه من إبليس؟
الليل بيصرخ هِـم يانهاري
والقلب جاري البحث في الكواليس
عناوين كتيره ف وسطهم داري
نكروا الخريطه وغيروا التضاريس
التعليقات مغلقة.