يا أول ضحكة حنان الهواري

يا اول ضحكة لملامحي
ولون قمحي يا حب العمر
يا تنهيدة في ليل الصبر
وتهويدة تعيد العمر من الاول
وأنا في الحب مجبولة
وممهورة حروف إسمك
على جيدي
يا دم بيجري في وريدي
وحب حروفه تنهيدة
وتعويذة يعيش العمر
شجر طارح جناين ورد
وأقول تاني ومية وألف
بحبك جملتي الأولى
ومعمولة على مقاسك
ولو الدنيا عكرت كاسك
أنا أرضك وأنا عرضك
إيديا تشد على إيدك
و أبنيلك
سنين عمري على جبينك
وأشيلك تاج على راسي
يا أملي وعزوتي وناسي
ولو ناسي أأقول تاني
أنا إلي الدنيا وجعاني
لكن حبك فى شرياني
أمل طارح
يا اول حب غنيتله
وحنيتله الإيدين بالنور
يا كاس بنور
يسرسب على القلوب مواويل
وأقول يا ليل بغنيلك
وأرسم من نجوم ليلك
طيور فرحة
في يوم شوقي هتجيلك
وتحكيلك
عن جسدين بروح واحدة
وفي اللقا غريبين