القصيده البكر شعر اشرف الشناوى شاعر عاميه البرامون
باحب القصيده
سهله وبسيطه
كلامها بيوصل
يادوب وف دقيقه
بتغسل فى روحنا
بمر الحقيقه
وترسم وشوشنا
فى قلب الحريقه
وتفضل حروفها
جميله و بريئه
باحب القصيده
حبيبه وصديقه
ماحبش اشوفها
فى زنقه وضيقه
وتلبس محزق
وفستان قصير
بدل ماتواسينا
وتاخد ايدينا
تطبطب علينا
وروحنا تغير
تداوى فى وجعنا
فنفرد شراعنا
بحب القصيده
يكون ليها معنى
وروح زى روحنا
تلم إللى باقى
فى غيط الشراقى
فيكبر املنا
ويطرح ورود
باحب القصيده
زى البارود
تحرر نفوسنا
تحل القيود
باحب القصيده
صبيه و عفيه
ورافعه النهود
بتاخد قلوبنا
تعدى السدود
تكسر سجونا
وتزرع مكانها
آلاف الوروود
باحب القصيده
تكون زى غيه
بتشغى بحمامها
فندخل نريح
نحس بكلامها
ندوب جوا منها
فنرتاح شويه
ونرجع نقولها
تعلم حروفها
بروحنا نشوفها
ونفضل نعيشها
ونعشقها هيه……………
التعليقات مغلقة.