فرج النفس و القلوب …
أسماء البيطار
من و إحنا عيال صُغيرين كنا نسمع صوت المطر نجري على الشبابيك و البلكونات علشان نتفرج عليه كانت النفس خالية من أي حاجة غير سعادة المطر و اتجاهه و البحر اللي عمله في شارعنا و الناس اللي طالعة جرى تحوش الميه احسن تغرق بيتها و ريحة الأرض اللي ترد الروح .
دلوقتي برده بنجري على البلكونات رافعين عنينا للسما و يمكن ما بنزلهاش و اكن المطر نازل علي قلوبنا بيغسلها و بيريحها من كل اللي فيها بدعوات يمكن محوشنها طول العام زي السما ما بتحوش السحاب بنبقي واقفين و اكننا في دُنيا غير الدنيا بنبقي مش سامعين غير صوت المطر و صوت الدعوات اللي اكنها طالعة بلى حاجب و لا حاجز وقتها بس هتعرف إنك كبرت و السعادة بالأشياء اتغير حالها
بس بردوا بنبقي فرحانين زي العيال بالمطر .
التعليقات مغلقة.