جمال ربَاني
أسـمـاء الـبـيـطـار
اكيد ما حدش فينا مالوش جذور ريفية أو على الأقل قريب من الريف و انت في طريقك لزيارة اهلك من وقت للتاني و انت بتتحرك بعربيتك و بتخرج من زحمة المدينة و دوشتها و كل حاجة مُصطنعة فيها
عفواً حتى الوشوش اللي ملامحها مش باينه من الألوان الصناعية اللي عليها .
و كل ما بتقرب من الريف بتحس بالهدوء و بتشوف جمال الطبيعة و جمال الوشوش الرباني الملامح الواضحة الصافية اللي السن مش باين عليها اللي بتشوف فيها جمال جدتك اللي بتتحاكي بيه و اد ايه كانت جميلة من غير اي الوان صناعية حطتها على بشرتها و عودتها عليها
كتير من البنات دلوقتي بنشوفها بتحط كمية كبيرة من المساحيق على وشها و الغريبة إنه بقى في أي وقت و كل الأوقات بقت بنفس الدرجة
يعني الصبح بقى زي بعد الضهر
الجامعة بقت زي الشُغل زي ما تروح فرح عادي
المشكلة إن البنت بتبان اكبر من سنها .
و في بعض الأمهات عفواً بتجبر بناتها أنها تحط مكياج اعتقاداً منها أنها هتتجوز بسرعة .
بس بجد المشكلة الأكبر إن البنت مش هتفضل بالمكياج اللي غير ملامحها تماماً اربعة و عشرين ساعة في البيت و كتير بردوا من المشاكل اللي بنسمع عنها إن مش دي اللي خدتها و يمكن تبدأ المشاكل بكلام يسم البدن و انتوا ضحكتوا علينا و الحاجات اللي بنسمع عنها دي .
مش بنقول نمنع البنت من إنها تتجمل بس يبقى في حدود المعقول
في حدود المكان اللي هتروحيه و كل ما كان اللي بتحطية بسيط كل ما هتباني اجمل و أرق على فكرة .
التعليقات مغلقة.