ع الرصيف…كلمات محمد كسبه

ع الرصيف…كلمات محمد كسبه

و إنت ماشي في اي شارع
خلي بالك من الرصيف
الرصيف ده دنيا تانية
فيها القوي و فيها الضعيف
ع الرصيف يجي الف ضيف
اللي قاعد مستني رزقه
بتبكبي عينه و يدعي قلبه
و لما فجاة يجي له شغله
يفرح انه مخابش امله
ع الرصيف

ع الرصيف ايوه جاي
عم عبده فاتح كشك شاي
قهوة سادة سكر زيادة
و كانز ساقع حلو لحماده
ع الرصيف كمنجه ناي
و ناس تغني الرزق جاي
ع الرصيف في كشك شاي

ع الرصيف سكنه و بيتو
ليل نهار الحج ميدو
يقلب دماغنا حبه مغني
و حبه يحكي لنا في حواديتو
و اخرتها يبكي و يزعل و يشكي
و يلعن الحظ اللي خرب بيتو

ع الرصيف فيه ١٠٠ رغيف
و الجزم في الفاترينات
اصحا يالي نومك خفيف
ده الرصيف كله حكايات
اللي ضاع و مخدش حقه
و اللي صاحبه في مصيبة ذقه
و اللي ساكت مبيفتحش بقه
و عايش في سجن الذكريات

ع الرصيف
في ناس فقيرة و ناس شمال
و ستات بتشحت بالعيال
و اونطجية و بلطجية و ١٠٠ قضية
و ناس مش لاقية الباطنية
و لا يفرق معاهم الحرام من الحلال

ع الرصيف مليون محل
و تعب و شغل و شقي و ذل
و ناس بتسرق و ناس بتحرق
قلب ناس قصاد الكل
و ناس بتغرق في العسل
ع الرصيف مليون مثل

ع الرصيف
حبة برد و حبة صيف
و ناس بتودع في الخريف
و عيال بتكسب بالفهلوه
ممكن يبيعولك الهوا
و يبسطوك و يفرحوك
و يروحوك جيبك نضيف

ع الرصيف
كل المشاكل و كل الحلول
و ١٠٠ ريس ١٠٠ مسؤل
و شخلل جيبك كله حبيبك
اوامرك يا باشا اطلب تنول
قوم حل عقدك ولا حد قدك
بس انتا قول كل مشاكلك
ع الرصيف

ع الرصيف
دجال و حاوي و بخور و جاوي
و ناس اساتذة في الفتاوي
و طبالين و رقصاين و معلمين
و ناس تطبطب و ناس تداوي
في جرح ناس ع الرصيف

ع الرصيف
في ناس حويطة و ناس عبيطة
و ناس تمدد جمب حيطة
و شباب بيعمل دوشة و زيطة
و الرصيف ملوش مكان
و ملوش لازمه ع الخريطة

الرصيف حزين و تايه
اصله مش عارف الحكاية
لكن م الاخر و في النهاية
الرصيف بقي نقطة سودة
و في بلدنا بقي شيء مخيف