مداحك وفلاحك…شعر أشرف الشناوي
مفيش غير قلبى مداحك
بيرسملك فى افراحك
ويكتبلك على التوته
يااجمل لحن عالنوته
ياقلب أخضر بيتمخطر
يشد معاه قلوب ياما
ويرميها فى بحر الشوق
يسهرها يفكرها
ويرمى لها الغرام ألوان
لحد ماتعشق السجان
وتستنى النجوم والليل
تهز جراحها وتغربل
وتزرع فى الوجع احلام
وتقفل عينها بالعافيه
عشان ماتنام
مفيش غير قلبى مداحك
بلاش افلام
ومهما خادوكى من رمشى
هتفضل ضحكتك عشى
ويفضل حضنك الغنوه
هاعدى بها بحور الويل
وطول ماهوايا جوايا
هاعيش العمر خدامك
وهاستنى المدد منك
وأكمل تانى مشوارى
ولو كل البشر لامنى
هاحبك غصب من عنى
اعيش ازاى بعيد عنك
مادام قلبى صبح منك
ولا ونك كتير بايعاه
وهوا شاريكى بالغالى
فليه يعنى بتتعالى
ومش عاجبك كدا حالى
دا حبك ياما مرمتنى
ودوخنى على الطرقات
فعاملينى كدا عاشق
ولو لساعات
مابين قلبك وبين قلبى
مافيش مسافات
انا راضى اعيش فيكى
الم الورد واسقيكى
ولو عشت الوجع فدادين
ولو عشقك يفوت فيا
كمآ السكاكين
وهافتحلك شراييني
على البحرى تبل الطين
وهاعملك فى قلبى مقام
مافيش غير قلبى مداحك
وفلاحك
وفرد حمام …………….
اشرف الشناوى
شاعر عاميه
البرامون
التعليقات مغلقة.