آخر أحلامي بقلم مدحت رياض
بتمنى حاجات موش موجودة
وأدفن أفكاري في أحلامي
والفكرة ان كانت مرفوضة
بلاقيها بتحصل قدامي
الحلم ساعات لو يتفسر
تتمنى يكون أصله حقيقة
وتحس الواقع متكسر
وحياتك كات اكبر ضيقة
وأنا مرة حلمت إني مفارق
في نهاية العمر المحتومة
وفي قلبي حاجات كنت ناسيها
أحلام في خيالي ومرسومة
وحاجات ملحقتش أكملها
أو يمكن كسلت أعملها
القصد أنا ميت والغاية
هستنى التفاصيل ويايا
أستنى ملايكة هتسألني
أو أفكر مين هيغسلني
أو مين هيصلي ويدعيلي
ولا أحسب كام مرة في عمري
القلب إتمنى وملحقشي
أو أنهو طريق كنت بحبه
وفي طول العمر أهو مكملشي
معادتش هتفرق أحلامي
حققت أنا إيه أو خليته
او مين راح يذكر أيامي
أو مين راح ينسى وحبيته
أنا شفت الجنة وموش عاوز
أرجع للدنيا ده لو أمكن
طب مين يختار قهر الدنيا
لو ممكن في الجنة هيسكن
وانشالله الحلم في يوم هبكون
والمولى انا عارف رب قلوب
والقلب اهو دايما راجع ليه
وساعات من قبل الذنب يتوب
التعليقات مغلقة.