وكان نفسي…شعر أسـامة نــور

وكان نفسي ….
أشوفك مرَّه من تاني
وتشيع عيني ….
من لمسك
ومن همسك
ومن رؤياك
وكان نفسي أبوس إيدك
فتديني دليل القوة والإحساس
وأحكي لك عن اللي كان
تعديني طريق الخوف
وتاخد إيدي في الزحمة
وتاخدني في كل صلاه
تحفظني أيات الله
وكان نفسي ….أعيش جنبك
اقلد كل افعالك
واتنطط على اكتافك
فتتبسم ..فتضحك دنيتي وبكره
وتاخدني في أحضانك
فترميني في نهر حنان
وتحكي لي حواديتك
عن الأوطان ..عن الصحبه
عن الآتي ف زمن فايت
وعن يومي وعن بكره
واحس اني كبير وياك
واشكي لك من اصحابي
ولعب الكوره وياهم
وحتى لما نتخانق
وفاول ولا مش فاول
ومين رقَّص وجاب الجون
وكان نفسي..
أكون زيك
ولو وقف الجميع ضدك
تقول الحق
ولا تطاطي في يوم ابدا
وترفع صوتك العالي
بكلمة ….لأ
وكان نفسي
أقول لك كل أسراري
وأحكي لك
عن البنت اللي حبتها
ويوم ما دبت فِ عنيها
وطيفها لما يتحكلي
بحس اني ملكت الكون
بحس الضعف والقوة
بحس الفرح والأحزان
انا خجلان ..
فمين غيرك يعرفني
معاني الحب..؟!
ويصور شعور القلب
ويدور عن المكنون
ويغزل لي خيوط الضوء
وساعة التوهه والترحال
بشوفك في عيون الناس
يا قلب جريء
وعاش رافض
في يوم ينداس
ودمه بيجري يرويني
حفر في الصخر شرايينه
وصار نبضه
بيحيي الارض والإنسان
فيا قلب الوطن منك
ورثت اني أكون حساس
ووقت الشدة تلقاني
بكون فارس
فٍ كل ميدان
أنا زيك اموت لكن
أكون واحد
من الأحرار
شعر / أسامة نــور