بيان حالة بقلم بقلمي مدحت رياض
حروف الإسم شئ عادي
في حالة غيري مكتوبة
ساعات الفرح لو خانة
هتبقى في عمري محسوبة
وفي غيرها خانات تاني
في وسط الحالة مشطوبة
ومثال ليها
في صوت الضحكة لا يوجد
سوى بسمة على الطاير
بحايل بيها ناس غيري
في وقت القلب فيه حاير
سنين الخبرة في الدنيا
دي أكتر حاجة موجودة
تخصص شيل هموم غيرك
عشان تنسى معاه همك
وجرح في جرح متسجل
جزاء رادع ولا يهمك
مادام التهمة كات طيبة
وإنك كتف بيسنِّد
ما عند المولى هتلاقي
جميع الأجر متجمد
هوايتك خانة باقيالك
هتكتب فيها عن نفسك
وقول فيها عليك فنان
يلم الكلمة ويسطر
ويخلط حبره بالاحزان
لكن راضي
في وسط الحالة محطوطة
كما ضلة في عز الصيف
ومكتوب السبب ليها
بأنك في الحياة كالضيف
فسايب سيرة تشفعلك
اذا اتسبق العزل م السيف
في دعوة من قلوب يمكن
يمر عليها اسمك طيف
وآخر الحالة تقديرك
بأنك صعب تغييرك
وختم الصبر كالهالة
يفوت العمر يوم ما تغيب
ونقراه في بيان حالة
التعليقات مغلقة.