أرواحنا آخر الليل بيتلاقوا
بقلم شريف عادل
جايز يكون دمعي
سايل على خدي
تقدر تقول كتر
البكا راحة
يا كومة جرح
جوايا ما تتهدي
وبكفايا يا دقة قلب فضّاحة
أنا قلبي مل
من انتظارك ف الغياب
وكفوف إيديا
لضمك اشتاقوا
يا من اخذتي
الفرقة بالأسباب
ارواحنا آخر الليل بيتلاقوا
كما درويش يخاف م الحب
فيلعن طعمه لو داقه
ويلعن عزفك الدامي على وتره
يا من اخذتي الفرقة بالأسباب
دقات قليبي
ف بعدك انفطروا
يا عاشقين وَجه
الجَمَال الحُر…
الغنوة باقية..
والزمان بيمُر..
أنا بعتذر
جايز تكون اوتار مشاعري
من البعاد ملوا
معلوم مجازا ف الوجع
كل اللي حبوا لابد يتذللوا
وإن اللجوء للفضفضة ..ردة
وبإن طيفك زارني من مدة
فبقيت بتوه فيكي
يا من أخذتي الفرقة بالأسباب
لمي اللي باقي من دموعي عتاب
وخدي اللي يكفيكي
يمكن حنين الروح فيا
يقدر يدفيكي
ونكمل المشوار سوا
التعليقات مغلقة.