سـلام ياصـاحـبي
بقلم معوض حلمي
الناصح
الدنيا ياصاحبي مخلوقه مع النقيضين
وأنـا وانــت ع الـــدوام ضــــــــــديـن
يمـــين أبـيــض … شــمال أســـــود
وانا وانت اللـي بنحدد مصيرنا فين
الشارد
مـصـيري فـرد طـرحه عــلى عيداني
ضميري برضـه مرتاح لـه ونام هاني
ياخدني لفين ويرميني ماهيش فارقه
مـادام الدنـيا عـلى كـيفي وعجــباني
الناصح
حمل الذنوب كالجبل قوص عمود ضهري
وانا اللي زي الجمل شيلت الهموم بدري
خفت مـن ربنا وراعيـته ف اعمــالي
والخـلق واعيالي شاهدين على طهري
الشارد
طبـع الخـلق نسايه وبتـركب المـوجه
بتـجري ع اللي مـعاه لو سكته عوجه
فتح عينيك حـواليك وشـوف العـجب
الناس قلـوبها حطب والنيه معـووجه
الناصح
حـتى النـيه ياصـاحـبي في علـم الله
واحد ع الصراط عدى والتاني شال بلواه
دنـيا دنـيه قـوي ربطـانا فـي رباطــها
فينا من عشق باطها وفينا من رماها وراه
الشارد
مالك كدا شكل الوجع شقك ودمعك سال
فرصة شبابك نعم عبي الدهب ف شوال
بلاش كلام بطال سيبك من اللي انجرح
إفرد جناح الفرح دومنا ف أحسن حال
الناصح
صـلاح الحـال زي ماقـالوا فـي اللـمه
ماهوش في المال ولا في الشال والعمه
دا فعل حلال يبان طارحه على عيالك
ودعـوة أم باقيالك تنجيك مـن الغمه
الشارد
والله ياصاحبي كلامك حلو بيوجعنا
وكأنك عايش في عالم تاني مش معنا
الدنيا للشطار ماهـيش كلام وخلاص
سيبك من الإخلاص معادش له معنى
الناصح
إسمع كلامي ولين سيبك مـن الفهلوه
دا اللعب ع الحبلين طبع اللي ضل وغوى
بعد الصـلا ع الـزين إفـتح كـتاب الله
هتلاقي عز وجاه وروشته فـيها الدوا
الشارد
سلام ياصاحبي سلام معاه ورود دوحي
معادش عندي كلام وسعت جروح روحي
الصـحـبه ليـها أصـول وعـرفـتها عنـك
والنصـح لو منك بيداوي في جروحي
الناصح
سلام ياصاحبي سلام لو ناوي ع التوبه
هادعيلك الديان في اليوم 200 نوبه
يكون شفيعنا النبي وإيديه تضم إيدينا
والجنه بيت لينا وف لـوحـنا مكتوبه
بقلمي الفلاح الفصيح معوض حلمي
منشأة بطاش / تمي الأمديد / دقهليه
التعليقات مغلقة.