حلم مالوش عازه…شعر أشرف الشناوي
ومن فضلك
بلاش تاخدينى
للتوهه
وترمينى فى سكك
لكلاب
ومن فضلك
دا مش فاضل
من القايمه
سرير ودولاب
وكام صوره
فى البوم الحياه
اغراب
وكام ضحكه بتتقلب
يادوب تطلع فتتعلب
فى فرن عذاب
وليه دايما بتتكى
على المجروح
تلمى الكل يتفرج
على المدبوح
فمن فضلك
تخلينى ولو حبه
أغنى وابوح
وبكفايه ومن فضلك
طلوع الروح
سنين والقلب متكتف
على القضبان
بيزرع ورد ويقسم
على الغربان
وصبح ينز من كفه
كيمان حرمان
وليل يمشى ويتعايق
ولو يسكر يكون فايق
يزق قلوبنا فى الضلمه
ويرميها كدا فى زنازين
ونسمع بس مانشوفش
صريخ موازين
وصبح يعدى
مش قادر
من الشيله وعبالقدر
وماشى يادوب
بيتعكز
وخايف للامل يطرح
فى ارض البور
فيتقفل عليه السور
وحلم مالوش هنا
عازه
يعبى الشمس
فى ازازه
ويستنى يطل نهار
ويطرح تانى
فوق كفه
الجريح نوار
يهز فى قلبه
ويغربل
حكاوى كتار
يعيش يحلم بيوم
راحه
بعيد عالنار
يلاقى الدنيا بتقفل
بيبان الدار
فيقعد تانى يستنى
ويحلم أنه فى الجنه
مايعرفش بانه
حمار
وان الجنه مليانه
بناس كفار
وان الجنه مليانه
بناس كفار.
اشرف الشناوى
شاعر عاميه
البرامون
التعليقات مغلقة.