عاشق جنابك
بقلم أشرف الشناوي
ايوا شوقى
زى طرح التوت
فى حجرك
لما اقول ايوا بحبك
يبقى قلبى ملان حنين
اوعى مره تقولى عنى
انى زى الكدابين
او هوايا مش حقيقى
وان انا م النخاسين
ايوا عاشق ولجنابك
عشق مكتوب عالجبين
وان زعلت فى يوم وهنتك
يبقى زيدتى البله طين
يبقى جرحى زاد وغطا
يبقى فاض الكيل انين
ابقى خفى حبه يعنى
عالغلابه المطحونين
اللى عاشوا تحت سقفك
رغم جوعهم شبعانين
واللى داروا الجرح عنك
من وجعهم ميتين
يبقى حضنك للديابه
والكلاب السعرانين
والحمام طفشان يغنى
مش لاقيله مكان امين
نفسه مره يلاقى فجرك
حر مش طالع سجين
او يلاقى صبح طالع
مش بأيد الحدادين
ايوا حلوه رغم مرك
رغم قسوتها السنين
افتحي الغيه لحمامك
سمعيه نبرة كلامك
هتلاقيه جوا البنانى
كل يوم بيقول غناوى
من حكاوى الطيبين
اللى عاشوا زى نخلك
عمره ما يحنى الجبين……………
أشرف الشناوي
شاعر عاميه
البرامون
التعليقات مغلقة.