الأمل بالعمل …أنا السوري … بقلم الشاعر المصري أحمد إبراهيم النجار
بتاريخ 17/7/2021
يا ليل طافح من الأحزان
وانا السوري
اللى تاه نوري
وضاع من عمري
ألف أذان
واه يا كلمة مكتوبه
يا حرية
على الجدران
واه يا دمعه مخنوقه
من امسي ومن حاضر
بدون عنوان
ومين حاكم هنا ليا ؟
وانا صوتي
اتسرق ف لجان
شعار مكتوب
كلام باهت
وليل واخد معاه أيام
وكرسي كبير
مالوش تاني
وسيّدنا على عرشه
بأسم إله
كما النمرود بيتحكم
في قوت مسلوب
وجوع ساكن
على الأبواب
ورابطة خبز ما تكفّي
لطفل جعان
وهو يعيش
تموت سوريا
وهو يعيش
يموت الجيش
وهو يعيش
تموت أحلام
وهو يعيش
ويحيا يحيا سيّدنا
فى وسط حصار
وادوق النار
واشرب
م الحميم أنهار
وإبني يموت
فدا سيدنا
وتدخل روس
فدا سيدنا
وتتحكم فى كلمتنا
وتحيا إيران
وحزب شيطان
على بابنا
ويخطف موت أعز الناس
وتصرخ فينا الأحزان
من تشريد من التجويع
ومن أهوال
ومرسومه على وشوشنا
كفايه سنين يا سيّدنا
على الكرسي
أرحل عنا ريّحنا
بلاش ترسم
شعار مكتوب
على الدخان
يهب الريح ويمحي الكدبة
وترجع تاني
مليون كدبة عمل وأمل
كلام في كلام
يا سيّدنا
كفااااااااايه حرااااااااااام
أرحل عننا وسبنا
بلاش هزيان
التعليقات مغلقة.