حروفي حلال…بقلم فتحي نجم
بتسبب وسارحه خطوتي
لجل الحروف متعيش
يم البراح وأنسام البداري
حاجبة عني شموس الصيف
طواف في الحضر
والريف والبراري
فارد دراعاتي بكل حب للأمل
ولا عمري هاداري
وراضي بِلبس الخيش
متشعبطة في الهوي طموحي
والرضي كاسي جبهتي
بلا تكليف أو زيف
متعبية روحي بسنابل
مسقية بشقشة من ضي
سبحة الدراويش
والقلم رغم الألم فاسي
والحرف ريشة ف طيف
كل الخطوط بتشبهني
وكأنها ناسي
وآخر الحروف بتندهلي
منا زيها سارح بإحساسي
ومش ناسي
ريشتي بِدّاعب
تفاصيل خدها بشويش
خليني جَنبك ياالبـراح
ريحة الحبر في أنوفي
أصبح كيف
صوت السواقي بيحرك كلمتي
وهمهماتي بتهديلي سكـتي
وابور الطحين بيفرد عجينُه
والطفل اللي جوايا لساه بريء
متبت في كسرة عيش
ومعاك ياحرفي
بنسي أرض الخوف
وبكون جريء
وبجرف كل دخيل ومتصنع
وصاحب هدم بيخرف
وسكاري الحرف والتخاريف
وبهد الجُدران الضيقة
اللي حبسانا ف التهميش
وبتنفسِك ياحروف
منا اتربيت في حجرك
وف حضن أنفاسك
وبين شقوق الرصيف
وع القهـاوي
منا الغــاوي
لِسِتنا الكلمة
والصورة عايشة في خيالي
والنوته والغنوة
تكفيني حروفي الحاف
مدام من حــلال
وصبحت كيف
غطايا منها لحاف
ومروحة وكولدير
وعليها دايماً بخاف
عشقت فيها الحال
والدلال والجمال والكمال
وبتمني أكون حريف
سرحة ومروحة ف جتتي
وبيها بعيش
معايا الأصل وصورة الفيش
بقلم/فتحـــى نجـــــم
أغسطس2021
التعليقات مغلقة.