حلم مات…بقلم الشاعر المصري أحمد إبراهيم النجار
لحظة سكات
والوهم فات
على كل باب
والنور سجين
والوقت بات
بين الدروب
ساكن سنين
وبدون ساعات
عقرب ثواني
رديئ قديم
مالهوش مكان
ساعة بدون
نبض الحياة
متعلقه فوق الجدار
والليل كسيح
مشلول ضرير
ساكن وعايش
بين عيون متغمّين
فى كابوس
سنين متلوّنين
لون الرماد لون السواد
ساكن بيوت
والموت وجود
بس الحياة
مليانه موت
والعنكبوت عشش
على كل الحيطان
ماعرفش كام
سِنّي أنا وقف الزمان
راحت معاه كل الحاجات
حلم مات
والصوت سكات
مالهوش وجود
بيني وبينك
ألف حد م الحدود
والنور سجين
كم ألف سد م السدود؟
بعيش بموت
وسط الخريف
نشف الحصاد
والوهم ساكن
ع الجزوع
محتاج رغيف
يسد جوع
من أي نوع
بس افتاحيلي شعاع بضؤ
حبة شروق محتاج أدوق
حبة عسل
من نحلك إللى ع الشجر
محتاج حليبك
إللي فايت من بعيد
ده الليل عنيد
صاحب خيوط
العنكبوت
تعلب يفوت
بين البيوت
يضحك بصوت
وصراخ عيال
يخطفها موت
من جوع طويل
ساكن بيوت
عايشه ف شتات
حلم مات
وآه يا واخده
من سنيني كل شئ
عصرك رديئ
فجرك غريق
ليلك عنيد
مالهوش شروق
سِكن الغروب
على طرحتك
والحلم مات
راحت وغابت ضحكتك
والحزن بات
كاسي السواد جلبيّتك
ساكنة الدموع
بين رموشك بسمتك
عقرب ساعات
واقف مقيّد خطوتك
والنوم كابوس
من ألف ألف ألف عام
لا عيشتي يومك
فى الأذان
ولا يوم الفجر
نوّر خطوتك
ولا حتى بان
ويا ما كان
مليون حكاية
ف ألف ليله مجمّعه
من ألف ألف ألف عام
لسه السكات
لسه الآهات
لسه اللى عايش
ع الرصيف
محتاج لحبة
من فتات فتات رغيف
حلم مات
حلم مات
والصوت سكات
مالهوش وجود
بيني وبينك ألف حد
م الحدود
والنور سجين
كم ألف سد
م السدود
بيني وبينك ليل طويل
كاسي السواد
كل البيوت
ملعون يا صوت
كان حلم مات
حلم مات
بقلم الشاعر المصري
أحمد إبراهيم النجار
التعليقات مغلقة.