بصمنا بالعشرة …
أسـمـاء الـبـيـطـار
يُقال أن هناك دراسة اكدت أن الرجل لا يستطيع التركيز سوى في عمل واحد فقط .
بالنسبة للبنات اللي متزوجة حديثاً يعني يا دوب زي ما بنقول بنت امبارح و بتشتكي من الإهمال و العصبية و إنها آخر اهتماماته و إنه ما بقاش زي الأول و إحنا يا دووب سنة اولى جواز
مش عوزه ابالغ لأن في بنات من أول شهر بتشتكي
يا حبيبتي الدراسة علشان تتعمل و تتأكدي من صحتها لازم تصبري
مش اقل من خمس سنين علشان تتعودي على طبع البنى آدم اللي قدامك
علشان تبتدي تتعرفوا على بعض عن قُرب
علشان تفهموا بعض و في ايه بينكم مشترك
في ايه تقدروا تغيروه علشان الحياة تستمر
في ايه نحطه في صندوق اسود و ما نفتحوش
لو سمحتم لي و في رأيي الشخصي
أن فترة الخطوبة من اكتر الفترات تصنع من الجانبين
و كل واحد تقريباً بييجي على نفسه و بيتجمل بما ليس فيه سواء على المستوى الشخصي أو حتى العائلي .
علشان كده و بالبلدي زي ما بنقول المشاكل ما بتاخدش غلوة و من اول شهر ناقر و نقير و انت مش انت و انتِ مش انتِ
و يمكن في أول سنة يحصل انفصال زي ما بنشوف كتير من الحالات
فترة الخطوبة اتعملت علشان تتعرفوا على طبائع بعض
هتقدروا تكملوا و له نقف و كل واحد يروح لحاله
لما تسمع بنت بتشتكي و هي على البر و بتقول لسته عيوب
و الولد كذلك و مصممين يكملوا تفتكروا النتيجة هتبقى ايه من أول يوم جواز مش من اول شهر .
تجملوا بما فيكم تكونوا اقرب للحقيقة و الواقع و صدقوني هتقدروا تكملوا الحياة
و عن تجربة شخصية لو تسمحوا لي ..
كنت بكلم خطيبي اللي اصبح زوجي في التليفون و فجأة سكت فأنا سكت و مش عارفة ايه السبب
فلما سألته .
قالي كان في خبر في نشرة الأخبار فكنت بسمعه .
اظن لو واحدة غيري كانت الدنيا قامت و يا داهية دُقي بس أنا احترمت صراحته و ما اخدتش الموضوع على قلبي .
و فهمت إن لازم يبقى في احترام للصراحة اولا
ثم لطبيعة الرجل اللي زي ما قولنا ما يقدرش يركز غير في شئ واحد ثانياً
و طبعاً لما تستمر الحياة هتتأكدي من الدراسة دي بنفسك و هتبصمي بالعشرة إنها طبيعة يا ست الكل مش إهمال و لا يحزنون و نخرب
البيت بقى و نشرد العيال و المشاكل اللي بقت تسد عين الشمس دي .
و في بعض التجاهل استمرار للحياة .
التعليقات مغلقة.