يا حمام…بقلم هنا سعد
يا طير ليه راقد فى عشك
قوم ورفرف للبراح
وافرد فى فضاك جناح
ليه تسلَّم للمناح
احكى للسماء عيشتك
زوم ، ماتسكت يا حمام
وغنى هديلك للوفا
وهات معاك حبة دفا
وما ترضى ينتفو ريشتك
من كام سنه
سكن السكات عندك
والقلب مليان بالكلام
خايف حزين
والعيون الدبلانين
على اللى خان
واللى باع واللى هان
بعد ما اديت الأمان
والمحبة هى فرشك
ليه بترضى يرَقَّدوك
على الهموم ويحَزِّنوك
عن حياتك يعزلوك
يدفنوك جوه عشك
ياحمام من زمان
لحنك حزين
تسكن الآهات فى صوتك
فرحتك ، راحت لفين ؟
اسمعك عمال تئن
قلبى من صوتك يحن
والجنون فى عقلى جَن
مين جفاك يا أبو قلب طيب
مين بالمية يُرشّك
يا حمام، ليه تِنَوّح
لو خانوك، طير ورَوّح
لو باعوك فى سوق رخيص
ابنى عش من جديد
وحط ريشة فوق جبينك
عند عرشك
الحياة حواليك جميلة
اوعى تحزن اى ليلة
اوعى تلعن حد خانك
اركنه ورا أعلى حيطة
دوق حلاوة الدنيا بعده
اوعى تسمح له ينشّك
أو يهشّك
قوم وانفض كل جرح
وانسى واطرد كل خيبة
انت تقدر انت أقوى
أنت هيبه
ياما دقت ع البيبان
كام مصيبة
والرضا ترياق حياتك
وابتسامتك تملا وشك
قوم وطير وعلّى حسك
غنى وارقص وحلى نفسك
دى السعادة هى قَسمك
هات حبيب وياك فى ايدك
وانسى خصمك اللى غشك
التعليقات مغلقة.