وهات لي العمر م الأول بقلم نورا صبحي
وهات لي العمر م الأول
ورجع لي ليالي زمان
لأيام لابسة ضحكاية
وحنية وراحة البال
وصوت أطفال بيتشقلب
في ضحكتهم غنا ودلال
وناس بتمد حنية
عشان تسند بايدها جبال
قلوب صافية كما المية
بدون تعكير ولا ألوان
ولون فوق كفوف الشمس ضحكاية
اشوف فيها ملامح قلب حبيته
باخد من عمري الف عمر واديله
واقضي سنين وانا من حبي بحكيله
وأقول: شوف جريت الأيام
يا عالم باقي من عمري كم ليلة ؟!
وكم ليلة فيهم تشبه ليالي زمان!
واعد الباقي واشبكهم نجوم في الليل
عشان تفضل حكاوينا حكاوي الخير
واعيد على قلبي أفراحه غنا ومواويل
واقول:كل اللي حبيتهم كانوا عناوين
لأجمل بيت هنا في قلبي وفيه ساكنين
زرعت الحب فيه توته
بيسهر تحتها الغايبين
ويعزمني هنا قلبي على قهوة
وآه لو نمت لو سهوة
تفور أشواقي جوه الحلم
فتتشكل ملامحهم على الفناجين
افتح عيني واتبسم
وأقول الشعر متقسم
وادوق عالماشي كم رشفة
حلاوتها بترسم كحل جوه العين
اقوم واجري على مرايتي
وأقول الحلوة جاية منين؟!
حنين الحنين
التعليقات مغلقة.