مصر هلت من اعمال فؤاد حداد
سيدة القصاص
على باب مصر…..أقدم عمل من أعمال…
الشاعر الكبير….
فؤاد حداد
قصيدة…
مصر هلت
أوّل شمس وأول قمره
في الدنيا دي يشوفْوا الشجره
مزروعه بإيدينْ فلاحَه
ونقايه في الأرض السمرا
طرحت خير وحنانْ وسماحَه
والعصفوره تشق الصحرا
والنخله تغني في الواحَه
أول حلم جناين خضرا
كانت من غير ما اكتب واقرا
أول دقه تدق في قلبي
وتجمع لي كل حبايبْي
والمّوال الطفل بيحبي
ويرقرق ويندي الزهرْه
خلتني في شباب الجمره
وشالتني على كف الراحَه
أول شمس وأول قمره
في الدنيا دي بشوفْوا الشجره
مزروعه بإيدينْ فلاحة
أول نسمه بتنقش صخره
تسكنها الروح السواحَه
قبل ما هلّ ونزل الساحَه
شيخ البلدْ الأصلي مشي لنا
أرض تحطنا أرض تشيلنا
الجميزه حضرت جيلنا
والكاتْب ناهض مربّع
لسه عينيه الواسعه بتسمع
بكره يهم وضى بيلْمع
وأميره أنا قلت يا وعدي
دا مش بسّ الحجر الوردي
دا حجر قادر يبقي شفايف
خدها ناعم نايم شايف
حلمها تحت شعاع النظره
في مرايه تغني وفْواحَه
أول شمس وأول قمره
في الدنيا دي يشوفْوا الشجره
مزروعه بإيدينْ فلاحة
.
التعليقات مغلقة.