جوه الاتوبيس…شعر رضا أبو شنب
وفي عز الضهر لاقيت اتوبيس
وركبت عشان انزل رمسيس
من كتر الزحمة اللي لقيتها
خلوني احس باني فطيس
خلوني بقيت زي الكفته
وفي حسبة برما لاني حسيس
وطلعت خلاص بره الفورمة
وانا كنت مفكر نفسي عريس
ولقيت الدنيا بقت ضلمه
والجو يساعد على التخسيس
ومفيش احساس ومفيش حرمه
واهو كله بيلعب مع ابليس
ولقيت لك واحدة بتضحكلي
والتانية بتخطف مني الكيس
انا قلت ابعد والحق نفسي
واعمل غلبان واعمل قديس
بصيت لي بعينها ولحقتني
على فين هتروح مني ياعتريس
لو قلت عليا بتسرقني
هصرخ وهقول الحق يا بوليس
الراجل عايز يسرقني
بيحاول ياخد مني الكيس
بايديه بيزق ويلزقلي
وانا واحدة شريفة وليا انيس
والكل اكيد هيصدقني
ومعايا الكل هيجي يهيص
وان قلت عليك بتبرقلي
هيتفوا عليك ويقولوا خسيس
وبقيت محتار وبقول يا مغيث
خرجني يا ربي من الاتوبيس
لا انا عايز اشوف اللي سرقني
ولا عايز حتى اشوف الكيس
لا انا عايز اشوف اللي سرقني
ولا عايز حتى اشوف الكيس
التعليقات مغلقة.