مشتاق لك يا بلدي…شعر : شهرزاد فايزة المياني
عارفاك منين يا بلدي
من ضحكة ف نن ولدي
من نسمة في العصاري
و انا قاعد ويا جاري
مع لمة و لقمة حلوة
بنغني أحلى غنوة
غنوة ود و أصالة
أو وقفة في وسط حارة
تحكي شهامة شبابنا
و تفوت بينا الليالي
و الغالي برضو غالي
مهما هاتبعد عيونا
قلوبنا فيك ساكنة
أوعي تلومي اللي غابوا
دول تاهوا … و ياما شابوا
و لا فرحوا باللي ينجح
و لا حزنوا للي خابوا
أيامهم باردة جدا
و ليالي الشوق ما دابوا
و حبال الود دهبت
و الضحكة ناسية بابه
أوعي تلومي اللي قسيوا
دول داقوا المر ويبة
و عيونهم طرح خيبة
و هموم هي الجراية
و الجوع ويا القسية
بيخلي الغر شايب
و القلب الغض يعصى
و يجافي ف الحبايب
لمي ولادك لحضنك
يبقوا شهادة ميلادك
و الغايب بكرة يرجع
و دموعه تبوس ترابك
عارفاك منين يا بلدي
من كتفي في كتف ولدي
نبني تاريخك غناوي
و الجاي بالصبر يحلا
و تهون بيه الخطاوي
دا الشوق في هواك غية
و هدية من اللي غاوي
التعليقات مغلقة.