حوار المحبّين بين الشاعر الثائر محمد أمون والشاعر يوسف رفول
بالفل والياسمين والجوري
حملوا التحية جوانح الدوري
ومع كل نبضة قلب يا رفول
بتذكرك ت يكمل سروري
وصلِت النسمه حامله ورداتها
ومضمخه بعطر الادب كلماتها…
استجديت قلبي…سمِعت صوت من الصميم
قلّي يا ريتك هالنبي الاصلو حكيم
ومن كتب الله تختزل آياتها
وحَييك متل طيورنا ….بلغاتها
يا شاعر الإحساس والرقة
خيّك فرشلك بالقلب شقة
عيش بفؤادي مكيَّف مسرور
ومن كرم حبي العاطفة تلقّى
اهل الرشاوي ليتهم يرشوا
متلك…بقصر من اللطف فرشو…
ليي الشرف اسكن بهيكِ دار
منّو لحالي…برفقة الشعار
مطرح ما سلطان الشعر…عرشو
بتبقى عزيزة وعامرة داري
وبين البشر بيزيد مقداري
ما دام عندي متلكن جيران
يا حسن حظي فيك يا جاري
قدرك عزير..بقدر ارزات الجبال
ودارك طموح الذوق مسكن للخيال…
ومش بس شعّار البلاغه بيكبروا..
بتكبر بدارك كل ارباب الجمال
طل القمر ع باب بيتي وقال
الجوهر اوزانو والذهب مثقال
نيال قلبك يا رفيق الشعر
بالروح جارك يُفتدى
والمال
اللي بيفتدي بالروح اصحابو
بسعر الجواهر غبرة ترابو..
اهل الوفا متلك يا جاري قلال
وما زال قلبك للوفا رسمال
در الشهامه…سِكِّرِة بابو
رفول عنك للحلا شو بقول ؟
بعد الكلام الطيب الراقي
عجز اليراع يحبِّر المنقول
وغطت دموع الشوق
أوراقي
والفكر صاير دايخ ومشلول
والوحي سكر ع الشعر
بابو
مجد السمؤال عَ دما ابنو انبنى
ومجدك ….قبالو… كل مجد بينحنى..
كنوز الثقافه فيك شافت حالها..
ولو هالدني بيهدموها الآلهَه
بيطل شعرك بالعدم..اول بِنَا.
بوحك عطاني سرور ومحبة وهنا
يا نجم ساطع يا بدر مايج سنا
إن شاء الله بتبقى مثابر بهمة ونشاط
وايدك بإيدي نعمر ويعلا البنا
انشالله يا شاعر…لِ بِنا بلادو سعى
نحقّق سوى أحلام بيضا ممتعه…
وغّيابنا اللي غرّقوا شواطي البحور
بدمعات مقهوره على غياب النسور…
يعودوا عَ كوخ المنزوي بِ جَل بور…
ولا الف قصر بأرض غربه واسعه.
الشاعر الثائر محمد أمون
التعليقات مغلقة.