حكايات ولا الف ليلة…شعر مسعد البحراوي
والله الدنيا سهله
مش صعبه ومستحيله
دي سهل تروق وتحلى
پ أهل وأصحاب وجيره
مافيهاش ولا أي مكسب
غير العشره الطويله
وغصون من وِد تكتب
حكايات ولا ألف ليله
شايفين النيل ونخله
وسواقي العطشانين ؟
كان لما الليل يروح له
يِتْرَشَقْ عاشقين ..
تسهر لهواه تبوح له
عن الشوق والحنين
عايشين غاية البساطه .
ومفيش بينهم صِعاب
كانوا بإبرة خياطه
يتشاركوا في الثواب
لما خدتنا العباطه
وخطئنا الصواب ..
جت وساقتنا الألاطه
عيشنا حياة الذئاب
—-
ياحبايبي الدنيا سهله
مش صعبه ومستحيله
هي بحُسن المعامله
وبالروح الطويله
ندي للعقل مُهله
يجيب أفكار جميله
يزرع نخل ف شطوطنا
يحيي النسمه العليله
وطباع الطيبين
جوانا كلنا
لو إحنا مؤمنين
هنراجع نفسنا
ونسمع بعضنا
راح نلقى الدنيا سهله
مش صعبه ومستحيله
مسعد البحراوي
التعليقات مغلقة.