فاكرة…
بقلم فتحى نجم
فـاكـره
ــــــــــــــ
فـاكـره وانا برسم لك
قلب صفير
علي ورق الكراريس
وبشبك حرفي وحرفك
في طرف الكلام
جنب الدبابيس
مع كام سلام وتنهيدة
وعيونا بتفرح وتهيص
وتتقابل بين الحروف أرواح
بتزرع في النفوس لهفه
وتبدل الأتراح
بكام فرحة
م المشاعر والأحاسيس
وانتي بتاكلي ضوافر إيدك
وبتحلميني عريس
شفت الفرحة
ناطه ف عيونك
من خلف الكواليس
قمت ساعتها صالب طولي
وصحيت علي صوت الكوابيس
مركبة شايلة كل همومنا
ماشية بتعرج جوا هويس
محوشة لينا كل الزيف
وكتير م التدليس
فاكره الحلم الوردي
والروح وخداكي ونيس
فاكره لعبنا جنب السور
وانا عامل عتريس
وانتي البت الجدعة
المعجونة بمية إبليس
كنتي كاشفه الحقيقة
ورؤيتك تضاريس
فاكره أول مرة قابلتك فيها
كانت الضحكة صافية بريئة
آه منها يامغيث
كانت تبعت غيمة ف عز الحر
وترطب ع القلب
ف خدوها للشرح
في أوضة التدريس
قالوا ننسخ منها لكل تعيس
فاكره وانا لابس العمة
وعامل قديس
واشرح جملة مش مفهومة
قال أيه في المواريث
وانا مفهمش غير في الحب
ولغة الأحاسيس
فاكره
أرواحنا الملاينين أحـلام
كنا معاها نطير زي المهاويس
بقلم/فتحى نجم
أكتوبر2021
التعليقات مغلقة.