عبور الكرامه شعر السيد الشيتي
جندى وتاهت مِخْلتُه بين المِخَل
عايش سنين ضلمه وجواه الأمل
النكسه سايبه له جروح تنزف ملل
كان حمل فوق اكتافه اتقل م الجبل
هاين عليه الموت وعاره يتغسل
غرقان ف أحزانه وبيعد السنين
رغم الهوان كان واخده للنصر الحنين
نفسه ف يوم يمسح دموع وطنه الحزين
جندي وخايف ع الوطن كرهت عنيه النوم
نفسه يسابق الزمن شايل ف قلبه هموم
يحلم يشوف العدو لما قيامته تقوم
ويطمن الشعب ال عاش العمر خايف م الهوان
ويرجع البسمه ال دبلت ع الشفايف من زمان
وسمعنا بعد الغاره صفارة امان
قامت قيامة العدو فى عز صوم رمضان
الارض يومها اتزلزلت كأنه كان طوفان
بارليف خلاص اتهدم كأنه عمره ماكان
المجد للجندى ال رَجَّع للوطن صوت الحياه
واختار يموت وبلاده مرفوعة الجباه
رجع كرامتنا ال سرقوها الغزاه
وبقي لنا بين كل الامم عزه وجاه
“الله اكبر “صرخه هزت كل جاحد
لما انفجر بركان غضب ولهيبه صاعد
كل الجنود عدوا الحدود وبقلب جامد
اتجمعوا ف حب الوطن مينا وحامد
ابنك يامصر رفض يعيش عمره ذليل
واختار طريق الموت وداس ع المستحيل
قلب ميزان الامم شهدت له اسرائيل
سجل لنا ملحمه ينقلها جيل ورا جيل
التعليقات مغلقة.