غريب بقلم مسعدالبحراوي
فتحت عيني لقيتني بين الناس غريب
منبوذ وماشي بضهري دايما وسطهم
فكرت أبعد والخطاوي تقول لي عيب
أمرك عجيب !
اشمعنى ياعني انت اللي مطلعتش ياناصح زيهم
دار الحوار بين الخطاوي وسكتي
وكلام يودي كلام يجيب
عديت على شط النصيب
ولا خدت بالي
بقى كل عود أخضر يمر على الطريق
يخطفني خطف
الخطوه تتقل والمُريب
إن العيون مبقتش تِظهِر أيّْ عطف
ولا اهتمام
ولا حتى غمزه تصحي فيك نار الهوى
تشعل فتيل الشوق لتبدأ معركه
وتشد أجزاء العيون
تطلق عيار النظره تصطاد المراد
إذا كان نُهى أو كان سُهى
أو كانت المُرجاه سُعاد
فجأه ودون مقدمات
جدران قلوعك بتلاقيها خيش وقش
ويمر في دماغك شريط
إنت اللي عشت تألفه
جوه الشريط باهته الصور
من كتر ما الراس صابها وَشْ
من أي حد بتعرفه
ترجع تعيش مع صوت صفير البلبل
اللي ف آخر الغيط الفسيح
تلقى الحراب من كل حدب ينسلون
يتصارعون
على مين يصيب جسمه الضعيف
ولأنه مخلوق عاش فصيح
عايش بيتكيف وبيراضي العيون
بيغني لحن الراقدون
تحت التراب
صامد ومتكلبش في غصن
جفاه الزمن
مبقاش له سوق وسط الشجر
فعل الغجر هو اللي فاضل
في الحياه
بالتالي مابيعمل حساب
لرماح بتتوجه عليه
راح يجرى إيه ؟
هيشدوا منه الروح ؟!
يآريت
على الأقل هيلقى للحن
اللي عايش يعزفه
مَن يسمعه .
فوق السحاب
ياأيها القوم اللي مقرأتوش جواب
الراقدون تحت التراب
التعليقات مغلقة.