العقول خاويات…دول كدابين زفه بقلم معوض حلمي
مافهمتش ليه الكلمة الخايفه
مخاصمه مدادي
وإن الحرف النازف دمه
بيشحت مني ودادي
مش عارف اعبر
عن أحاسيس الناس ومشاعري
ولا عارف أكتب شعري
ف زمن الفكر السادي
ودا عادي ف دينهم
لأن عجيـنهم ..
مزيج من غدر الديابه
ومكر التعالب
والخديعه الجارحه
عجين فريد
من غير خميره محضره
من غير دقيق غله ودره
مابيستويش في القالب
ولا تقبلوش المطرحه
معجون بفن اللف والدوران
واللمـعه ع الشفه
دول كدابين زفه
وكدبهم ع الكيف
ماشيين ورا كل راية زيف
مابيرجعوش أبدا
رافعين شعار المرحلة
فـتح يالــــوز
سـقـف تحوز
إسـرق تـفـوز
لملم حروف العارفين
كمـل ديوانك
وبيعه في الميادين
واركب كروز
ومـــش مـهـم
لو جاب ديوانك فكر ضال
أو ضل خلق الله ومال
أو شال وحط على الحيطان
زي غربان الغيطان
عايشين شذوذ الفكر
في كل واد هائمين
عاملين له حلقة ذكر
حافظين ومش فاهمين
كغثاء طير جمعهم
بل للشتات
يتأوهون
يصفقون
يتمايلون
يهللون
على الحروف الباليات
وكأنهم أعجاز نخل فارغات
يقتاتون على الفتات
يروحون خماصا
يعـودون بطـــانا
والعقـول خـاويات
بقلمي الفلاح الفصيح .. معوض حلمي
منشأة بطاش .. تمي الأمديد .. دقهليه
التعليقات مغلقة.