الألف ميل بقلم حمادة ريحان
الألف ميل دايما بخطوة بيبتدي
وانت القوي أول خطاويك كعبلة
واقف بتدي تمام لسيدك وانت لابس مريلة
واقف بتنزف قهر باين من عنيك
رجليك صابتها الرعشة والبدن الهزيل
زي النخيل لما يتقطع جريده
خايف لحد ببلطة باردة يقطعه
ولحد امتي الخوف يزيد فيك مطمعه
وتسيب مكانك للديابة يبرطعو
خليك جريئ وابدأ بخطوة الالف ميل
الليل طويل والفجر مش ناوي الطلوع
طول مانت حابس قهرتك بين الضلوع
والجوع بينهش معدتك
والخوف مزلزل خطوتك
مربوط في سلسة الضياع
ويا الجياع والعمر ضاع وضاعت معاه
تحت الظروف المزمنة
كل الاماني الممكنة
كل القلوب المؤمنة
بقضية الموت الحلال
شلال بيجري في دمنا
والخوف بيقتل حلمنا
والصبر ع المر اللي زاد الطينة بلة
حطم جدار الصمت واكسر الف قلة
الدنيا فله.. لو بدأت وخدت خطوة
مش ضروري تشيل سلاح أو حتي مطوة
السلاح جواك في ذاتك
وف ايمانك بالقضية
اللي بيها تعيش حياتك
امنياتك بين ايديك
اوعي تنساها لمماتك
دمع عينك حاسه ناطق
بحر خوفك بالعزيمة
يبقي له ميت الف شاطئ
ليه تسيب الخوف يذلك
اكسر الحاجز لعلك
تبقي يوم صاحب قرار
واللي صار مايصيرش تاني
كن أناني وامسك المجداف وعافر
اوعي تهرب زي غيرك
اللي ساب حلمه وسافر
كلهم في الاصل كافر
بالقضية وبالايمان
كل وقت وله أدان
الامان لو توب لبسته
كنت حسيت يومها قيمته
كنت نفضت الغبار
كنت شوفت بنن عينك
كل ليل آخره نهار
واللي طار يرجع لعشه
ابتسامة تبان في وشه
اللي وشه وضي عينه
لمعته زي النهار
والنهار علشان مايطلع
يبقي لازم تبتدي
والبداية بخطوة واحدة
تلقي نفسك ماشي ميل
والسبيل تطويه خطاوي
بس لازم تبقي ناوي
ع المسير حتي النهاية
والنهاية انك تحقق
حلم عايش له سنين
الامل مالهوش نهاية
طول ماحلمك بين ايديك
الرسالة دي مني ليك
بيها يمكن تهتدي
والالف ميل ……….
دايما بخطوة بيبتدي
التعليقات مغلقة.