شد حيلك بقلم أحمد طاحون

شد حيلك لسه فاضل فرصه تانيه في الحياه
لسه باقي في التلاقي ناس في ايدها طوق نجاه
اوعى تندم ع اللي فارق واللي سابك في الطريق
الغريق له بر مرسى مهما سافر ولا تاه
شد حيلك لسه فاضل فرصه تانيه في الحياه

والغريب في العمر يمكن يبقى صاحب او صديق
والرفيق ممكن يفارق او يخاصم وقت ضيق
واللي بيحب النهار ده بكره يكره او يمل
واللي قلبه اليوم حنين احتمال يقلب حريق
والغريب في العمر يمكن يبقى صاحب او صديق

اوعى تحسب في حساباتك او ترتب امنيات
سيبها ماشيه زي ماهي واللي تصبح فيه تبات
اللي يوم هتخاف عليه ولا راح تبكي عليه
تلتقيه في الجد قال لك يابني ابوك السقى مات
اوعى تحسب في حساباتك او ترتب أمنيات

شد حيلك لسه فاضل فرصه تانيه في الحياه
لسه باقي في التلاقي ناس في ايدها طوق نجاه
اوعى تندم ع اللي فارق واللي سابك في الطريق
الغريق له بر مرسى مهما سافر ولا تاه
شد حيلك لسه فاضل فرصه تانيه في الحياه