ياما هتشوف عجايب…شعر السيد ندا
يااللي طالع فيها ياما
شايف نفسك من فوق
فوق عنيك مليون غمامة
اصحا من وهمك وفوق
آخرة الغرور ندامة
مستحيل أعمى يسوق
لو راغب في السلامة
اتعلم أدب وذوق
أي حد يكون بغيره
مافي حد بنفسه بس
قولي إيه بيكون مصيره
اللي جواه اتحبس
كل يوم قدام ضميره
يشوف نفسه ألف نفس
وحده بس شايف خيره
مافي حد بيه يحس
الحياة بستان أماني
كل واحد له نصيبه
اللي فيها بيعاني
واللي حظه طبيبه
واللي حلمه التاني
والتاني حلمه يسيبه
واللي عمره ضاع ف ثواني
واللي كان عمره حبيبه
قلَّابة الدنيا ديَّا
مابين فرح ومتاعب
أوقات أحلام ورديَّة
وأوقات مفهاش حبايب
واجه فيها بنديَّة
نفسك قبل التعالب
طول ما إرادتك قوية
ياما هتشوف عجايب
السيد ندا 15/10/2021
التعليقات مغلقة.