غيران من الكمبيوتر…شعر أحمد فؤاد الهادي
حبيبي تَمَلّى اللاب في إديه
واخده في حضنه بيسليه
ياريتنى كي بورد
تلمسنى أنامله وانا احَنّيه
ياريتنى الشاشة
بكل بشاشة.. أسهر اطالع كده ف عنيه
وانا مش هارد
بس ياريتنى أكون الهارد
أشيل أسراره وادارى عليه
أو حتى فلاشة
زي فراشة.. رايحة وجاية وشايفه عنية
ياريتني الإنتر
قبل ما فكر.. يحصل اللى يشاور هو عليه
وللا مسافة
بكل حصافة.. أزيح الحيرة من حواليه
وللا اسكيب
ودا مش عيب.. اللي يضايقه بسرعة اخفيه
ياسلام لو تاب
يلاقيني كتاب.. يوصف بس ف سحر عنيه
آه لو كنت انا فنشن كى
لكنت فتحت القلب، وجبت الهلب رميته عليه
ياناس دلونى
حبيبى واحشنى
وانا مش عارف أعمل أيه؟
أحمد فؤاد الهادي – مصر
التعليقات مغلقة.